ចិន ៖ ប្រទេសចិនបានធ្វើតេស្តរកវីរុសកូវីដ-១៩ លើមនុស្សជាង២៥ម៉ឺននាក់ បន្ទាប់ពីករណីឆ្លងថ្មីមួយចំនួនត្រូវបានរកឃើញនៅទីក្រុងឆេងឌូ ស្ថិតនៅភាគខាងត្បូងប្រទេសចិន។
ក្រុមមន្ត្រីសុខាភិបាលមូលដ្ឋានបាននិយាយថា គូស្វាមីភរិយាវ័យចំណាស់មួយគូត្រូវបានធ្វើតេស្តវិជ្ជមានវីរុសកូវីដ-១៩ នៅដើមសប្ដាហ៍នេះ ហើយអាជ្ញាធរកំពុងតាមរកអ្នកដែលបានប៉ះពាល់ពួកគេ និងកំពុងធ្វើតេស្តសំណាកដែលយកចេញពីចំណីអាហារ។ ក្រុមមន្ត្រីថា ដានវីរុសកូវីដ-១៩ ត្រូវបានរកឃើញនៅលើម្ហូបអាហារដែលទុកនៅក្នុងទូរទឹកកករបស់គូស្វាមីភរិយាចំណាស់នោះ និងនៅលើជ្រញ់នៅក្នុងផ្ទះល្វែងរបស់ពួកគេ។
គណៈកម្មការសុខាភិបាលក្រុងឆេងឌូ បានប្រកាសថា គិតត្រឹមថ្ងៃអង្គារ អ្នកស្រុកចំនួន ២៥៥.២០០នាក់នៅក្នុងទីក្រុងនេះត្រូវបានធ្វើតេស្តរកវីរុសកូវីដ-១៩ ដោយមានករណីវិជ្ជមានចំនួន៦នាក់។
យោងតាមអាជ្ញាធរមូលដ្ឋានសាលារៀន និងថ្នាក់មតេយ្យក្នុងសង្កាត់ពិឌូ (Pidu) ជាកន្លែងដែលករណីឆ្លងបានលេចឡើងនោះ ត្រូវបានបិទ ហើយសិស្ស និងគ្រូបង្រៀនត្រូវបានដាក់ឲ្យនៅក្រោមវិធានការចត្តាឡីស័ក និងធ្វើតេស្តរកវីរុសនេះ។
អង្គការសុខភាពពិភពលោកបានប្រកាសថា បច្ចុប្បន្ននេះមិនមានព័ស្ដុតាងណាមួយដែលបញ្ជាក់ថា មនុស្សអាចឆ្លងវីរុសកូវីដ-១៩ ពីចំណីអាហារ ឬកញ្ចប់ម្ហូបអាហារឡើយ៕
