ខេត្តស្វាយរៀង ៖ លោកជំទាវកិត្តិសង្គហបណ្ឌិត ម៉ែន សំអន គណៈកិត្តិយសសាខាកាកបាទក្រហមកម្ពុជាខេត្តស្វាយរៀង ដោយមានការចូលរួមពីសំណាក់ ឯកឧត្តម ម៉ែន វិបុល អភិបាលនៃគណៈអភិបាលខេត្តស្វាយរៀង រួមជាមួយប្រតិភូអមដំណើរបានចុះសួរសុខទុក្ខ និងនាំយកអំណោយកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ផ្តល់ជូនប្រជាពលរដ្ឋជួបរងគ្រោះក្នុងហេតុការណ៍ ខ្យល់កន្ត្រាក់ នៅស្រុករមាសហែក នៃខេត្តស្វាយរៀង សរុបចំនួន១៤៦គ្រួសារ នាព្រឹកថ្ងៃចន្ទ ៥រោច ខែភទ្របទ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី៧ ខែកញ្ញា ឆ្នាំ២០២០។
សូមបញ្ជាក់ថា ក្នុងហេតុការណ៍ ខ្យល់កន្ត្រាក់នេះ បានកើតឡើងនៅយប់ថ្ងៃទី៥ ខែកញ្ញា ឆ្នាំ២០២០ បានធ្វើឲ្យប៉ះពាល់ដល់ប្រជាពលរដ្ឋ៣៥៧គ្រួសារ ក្នុងនោះបានកើតឡើងនៅស្រុករមាសហែក (២ឃុំ គឺ ឃុំម្រាម និងឃុំចន្ត្រី) ចំនួន៣៥១គ្រួសារ និងស្រុកស្វាយជ្រំ នៅឃុំក្រោលគោ ចំនួន ៦គ្រួសារ ដែលបណ្តាលឲ្យខូចខាតផ្ទះធ្ងន់ និងស្រាល និងបណ្តាលឲ្យរងរបួស៣នាក់ (របួសធ្ងន់១នាក់ និងស្រាល ២នាក់) ។
លោកជំទាវបានថ្លែងថា ការចុះសួរសុខទុក្ខនេះ ត្រូវបានធ្វើភ្លាម ក្រោយពីបានទទួលរបាយការណ៍ពី ឯកឧត្តម ម៉ែន វិបុល គណៈអភិបាល នៃអភិបាលខេត្តស្វាយរៀង។ លោកជំទាវក៏បានផ្តាំផ្ញើសាកសួរទុក្ខ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជានិច្ចជាកាលសម្តេច តែងតែគិតគូរជានិច្ច ពីសុខទុក្ខ សុខភាពនិងជីវភាពរស់នៅ របស់បងប្អូនប្រជាពលរដ្ឋ ដោយមិនប្រកាន់និន្នការនយោបាយ ជំនឿ សាសនា ពណ៌សម្បុរនោះឡើយ ។ ទីណាមានការលំបាក ទីនោះមានកាកបាទក្រហមកម្ពុជា ដោយមិនគិតភាពលំបាក ជិតឬឆ្ងាយ ព្យុះភ្លៀង កាកបាទក្រហមកម្ពុជា ទៅដល់ទីនោះភ្លាមដោយមិនរួញរាឡើយ។
លោកជំទាវក៏បាន កោតសសើរដល់អាជ្ញាធរគ្រប់លំដាប់ថ្នាក់នៃខេត្តស្វាយរៀង ដែលបានចូលរួមយ៉ាងសកម្មក្នុង ការទប់ស្កាត់ការឆ្លងរីករាលដាលនៃជម្ងឺកូវីដ១៩ ជាពិសេស ការធ្វើចត្តឡីស័កឲ្យបានហ្មត់ចត់ ចំពោះបងប្អូនដែលធ្វើការចំណាកស្រុក នៅពេលដែលត្រលប់ចូលមកស្រុកកំណើតវិញ។
លោកជំទាវក៏បានក្រើនរំលឹកដល់ប្រជាពលរដ្ឋកម្ពុជាគ្រប់រូបត្រូវគោរព និងអនុវត្តឲ្យបានខ្ជាប់ខ្ជួននូវគោលការណ៍ រក្សាគម្លាតសង្គម និងវិធានការនានាតាមការកំណត់របស់ក្រសួងសុខាភិបាល និងត្រូវបន្តរក្សាការប្រុងប្រយ័ត្នខ្ពស់ក្នុងការបង្ការ និងការពារនូវការឆ្លងរីករាលដាលនៃជំងឺកូវីដ១៩ នៃរលកទី២ ខណៈពេលដែលពិភពលោកកំពុងប្រឈមមុខនឹងការរាត្បាតយ៉ាងខ្លាំងដោយសារជម្ងឺមួយនេះ។ លោកជំទាវបានផ្តាំផ្ញើឲ្យប្រជាពលរដ្ឋទាំងអស់គ្នាត្រូវបង្កើនការផលិតផ្នែកកសិកម្ម តាមរយៈ ការដាំដុះ ការចិញ្ចឹមសត្វ ជាដើម ចំណែកឯអជ្ញាធរត្រូវតែពង្រឹងឲ្យមានប្រសិទ្ធិភាពនូវ ភូមិ-ឃុំមានសុវត្ថិភាព និងចូលរួមគោរពច្បាប់ចរាចរណ៍ទាំងអស់គ្នា ។
អំណោយដែលត្រូវផ្តល់ ជូនពលរដ្ឋទាំង១៤៦គ្រួសារ រួមមាន ៖ ទី១. គ្រួសាររងគ្រោះធ្ងន់ធ្ងរ ទទួលបាន ៖អង្ករ៣០គីឡូក្រាម មី ១កេស ត្រីខ ១០កំប៉ុង ទឹកស៊ីអ៊ីវ ៦ដប ធុងទឹកជ័រ ១ ឆ្នាំងបាយ និងឆ្នាំងសម្លរ ២ កៅស៊ូតង់ ១ កន្ទេលបត់ ១ ឃីត ១កញ្ជប់ និងថវិកាចំនួន២០ម៉ឺនរៀល។ ទី២. គ្រួសាររងគ្រោះមធ្យម ទទួលបាន ៖ អង្ករ៣០គីឡូក្រាម មី ១កេស ត្រីខ ១០កំប៉ុង ទឹកស៊ីអ៊ីវ ៦ដប កន្ទេលបត់ ១ ឃីត ១កញ្ជប់ និងថវិកាចំនួន ៦ម៉ឺនរៀល។
ចំណែកឯអ្នករងរបួសសម្រាកនៅមន្ទីរពេទ្យក៏បានទទួលការឧបត្ថម្ភពី ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងជាប្រធានក្រុមការងាររាជរដ្ឋាភិបាលចុះជួយស្រុករមាសហែក នៃខេត្តស្វាយរៀង សម្រាប់អ្នករងរបួសធ្ងន់ទទួលបានថវិកា ១លានរៀល និងអ្នករបួសស្រាលទទួលបានថវិកា ៥០ម៉ឺនរៀល៕
