ភ្នំពេញៈ ខណៈពេលប្រមុខរដ្ឋាភិបាលព្រមានចាប់ខ្លួនអ្នកបំផុសព័ត៌មានក្លែងក្លាយពីកូវីដ១៩។ក្រសួងយុត្តិធម៌បានដាក់បទបញ្ជាឲ្យតំណាងអយ្យការទូទាំងប្រទេសធ្វើការពង្រឹងនិងរឹតបន្តឹងក្នុងការអនុវត្តវិធានការច្បាប់ចំពោះការផ្សព្វផ្សាយឬបង្កើតព័ត៌មានមិនពិតពាក់ព័ន្ធនឹងកូរ៉ូណាវីរុស។នៅថ្ងៃនេះដែរបុរសម្នាក់ក៏ត្រូវបាននគរបាលក្រុងបញ្ជូនទៅកាន់តុលាការ ក្រោមការចោទប្រកាន់ថាបានផ្សព្វផ្សាយព័ត៌មានមិនពិតពាក់ព័ន្ធនឹងករណីនេះ។បន្ទាប់ពីមានមានអ្នកប្រើប្រាស់បណ្តាញសង្គមមួយចំនួនបានធ្វើការផ្សព្វផ្សាយព័ត៌មានមិនពិតពាក់ព័ន្ធនឹងកូវីដ១៩ ដែលបង្កើតឲ្យមានការភិតភ័យដល់ប្រជាពលរដ្ឋ ក្រសួងយុត្តិធម៌បានដាក់បទបញ្ជាឲ្យតំណាង អយ្យការទូទាំងប្រទេស ធ្វើការពង្រឹង និងរឹតបន្តឹងក្នុងការអនុវត្តវិធានការច្បាប់ចំពោះការផ្សព្វផ្សាយឬបង្កើតព័ត៌មានមិនពិត។ នេះបើតាមលោក គឹម សន្តិភាព រដ្ឋលេខាធិការនិងជាអ្នកនាំពាក្យក្រសួងយុត្តិធម៌ ដែលបានអះអាងប្រាប់វិទ្យុបារាំងអន្តរជាតិនៅថ្ងៃទី១០ ខែមីនា។លោក គឹម សន្តិភាព បន្តថា សកម្មភាពរបស់ក្រសួងយុត្តិធម៌ពេលនេះ គឺជាការចូលរួមទប់ស្កាត់ភាពភ័យខ្លាចរបស់ប្រជាពលរដ្ឋតាមរយៈការផ្សព្វផ្សាយព័ត៌មានមិនពិត ដែលប៉ះពាល់សង្គមជាតិ និងសេដ្ឋកិច្ចផងដែរ។ លោកថាបើមិនអនុវត្តច្បាប់តឹងរឹងទេ អ្នកប្រព្រឹត្តិនឹងមិនមានការខ្លាចរអាឡើយ។
កាលពីថ្ងៃទី៩ ខែមីនា បុរសអាយុ៣៨ឆ្នាំម្នាក់ ដែលបង្ហោះវីដេអូឃ្លីបមួយ នៅលើគណនីហ្វេសប៊ុកឈ្មោះ «Tep Visal» ត្រូវបានសមត្ថកិច្ចក្រុងចាប់ខ្លួន ហើយបញ្ជូនខ្លួនទៅកាន់តុលាការនៅថ្ងៃទី១០ ខែមីនា ក្រោមការចោទប្រកាន់ថាបុរសរូបនេះបានផ្សព្វផ្សាយនិងបង្កើតនូវព័ត៌មានមិនពិត តាមបណ្តាញសង្គមហ្វេសប៊ុក ពាក់ព័ន្ធករណីជំងឺកូវីដ១៩។ នេះបើតាមស្នងការនគរបាលក្រុងភ្នំពេញ លោក ស ថេត ប្រាប់វិទ្យុបារាំងអន្តរជាតិនៅរសៀលថ្ងៃទី១០ ខែមីនា។លោក ស ថេត អះអាងទៀតថា កន្លងមកអ្នកចែករំលែក(Share)ព័ត៌មានមិនពិតពីកូវីដ១៩ត្រូវបានអាជ្ញាធរហៅមកធ្វើអប់រំណែនាំ។ ប៉ុន្តែបើអ្នកផ្សព្វផ្សាយឬបង្កើតព័ត៌មានមិនពិតអាចនឹងត្រូវជាប់ពន្ធនាគារពី១ឆ្នាំទៅ២ឆ្នាំ។បើតាមលោក គឹម សន្តិភាព ការអនុវត្តច្បាប់តឹងរឹងលើអ្នកផ្សព្វផ្សាយព័ត៌មានមិនពិត គឺមិនពាក់ព័ន្ធនឹងសេរីភាពនោះទេ ដោយលោកអះអាងថាមនុស្សម្នាក់ៗមានសេរីភាព។ ប៉ុន្តែមិនត្រូវអនុវត្តសេរីភាពនោះឲ្យប៉ះពាល់ដល់អ្នកដទៃសន្តិសុខសណ្តាប់ធ្នាប់ របស់ប្រទេសជាតិឡើយ៕
