ខេត្តក្រចេះ ៖ ដោយមានការគិតគូរ និងយកចិត្តទុកដាក់ខ្ពស់ពីសំណាក់រាជរដ្ឋាភិបាល និងដើម្បីឆ្លើយតបបញ្ហាខ្វះទឹកសម្រាប់ស្រោចស្របស្រូវប្រាំងនាពេលខាងមុខនេះ ប្រធានក្រុមការងារចុះជួយស្រុកឆ្លូងឯកឧត្ដម ឆាន់ សាផាន រដ្ឋខាធិការក្រសួងរៀបចំដែនដី នរគរូបនីយកម្ម និងសំណង់ ក៏ដូចជាអាជ្ញាធរខេត្តក្រចេះ ឯកឧត្ដម ហឿ ស៊ីយ៉ែម ប្រធានក្រុមប្រឹក្សាខេត្ត ឯកឧត្ដម វ៉ា ថន អភិបាលនៃគណៈអភិបាលខេត្តក្រចេះបានដឹកនាំក្រុមការងារអញ្ជើញចុះជួបសំណេះសំណាលសាកសួរសុខទុក្ខ និងពិនិត្យការងារបូមទឹកស្តុកទុករបស់មន្ទីរធនធានទឹក និងឧតុនិយមខេត្តដើម្បីអូសយកទឹកមករក្សាទុកសម្រាប់ជួយសង្គ្រោះស្រូវនៅដូវប្រាំងនាពេលខាងមុខ ដែលប្រជាពលរដ្ឋជួបការខ្វះខាតទឹកសម្រាប់ស្រោចស្រព្វ។
ការធ្វើការងារបែបនេះ គឺដោយសារឆ្នាំនេះទឹកទន្លេមេគ្គងមានកំរិតទាបមិនអាចនាំទឹកហូរចូលបំពេញ បឹង ត្រពាំង អាងស្តុក ដែលជាហេតុធ្វើឲ្យប្រជាពលរដ្ឋជួបបញ្ហាខ្វះទឹកសម្រាប់ស្រោចស្រព្វស្រូវប្រាំងនាពេលខាងមុខនេះ។ ការអញ្ជើញចុះជួបសំណេះសំណាល សាកសួរសុខទុក្ខ និងពិនិត្យការងារបូមទឹកស្តុកទុកប្រព្រឹត្តទៅនៅថ្ងៃទី០៣ តុលា ២០២០ នៅក្នុងភូមិថ្មី ឃុំខ្សាច់អណ្ដែត ស្រុកឆ្លូង ខេត្តក្រចេះ។
មានប្រសាសន៍សំណេះសំណាលទៅកាន់បងបង្អូនប្រជាកសិករ ឯកឧត្ដម ឆាន់ សាផាន ប្រធានក្រុមការងាររាជរដ្ឋាភិបាលបានបញ្ជាក់ថា រាជរដ្ឋាភិបាលដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខដឹកនាំតែងតែគិតគូរខ្ពស់ចំពោះសុខទុក្ខ និងជីវភាពរស់នៅរបស់ប្រជាពលរដ្ឋគ្រប់ៗរូប ហើយមានចក្ខុវិស័យវែងឆ្ងាយ ក្នុងការដឹកនាំប្រទេសឲ្យមានការអភិវឌ្ឍន៍រីកចម្រើនលើគ្រប់វិស័យ និងឲ្យប្រទេសជាតិទទួលបាននូវសុខសន្តិភាព ស្ថិរភាពសង្គម ពេញបរិបូណ៍ជូនប្រជាពលរដ្ឋខ្មែរឲ្យរស់ក្រោមដំបូលសន្តិភាពរហូតមកដល់បច្ចុប្បន្ន។
ជាមួយគ្នានោះ ឯកឧត្តមមានប្រសាសន៍ក្រើនរំលឹកដល់ប្រជាកសិករយើងត្រូវចេះពិនិត្យមើលស្ថានភាពនៃការបង្កបង្កើនដូចជាការជ្រើសរើសពូជស្រូវមើលពីប្រភពទឹក ឬបង្វែរពីការធ្វើស្រូវទៅជាដាំដំណាំ ផ្សេងៗ ដើម្បីជាការបញ្ជៀសនៃភាពគ្រោះមហន្តរាយដល់កសិផលខ្លួន។ ម្យ៉ាងវិញទៀតត្រូវចេះថែរក្សាសម្ភារៈប្រើប្រាស់ឲ្យបានល្អមើលថែទាំទឹកទុកដាក់របស់ប្រើប្រាស់ឲ្យត្រឹមត្រូវ និងត្រូវចេះដឹងគុណដល់ប្រភពអ្នកជួយឧបត្ថមគាំទ្រដល់ខ្លួន។ ហើយនិងរួមគ្នារក្សានូវសុខសន្តិភាពមិនមានហានិភ័យកើតឡើង ។
នៅក្នុងឱកាសនោះដែរ ដោយមានការយកចិត្តទុកដាក់ពីសំណាក់ថ្នាក់ដឹកនាំក្នុងខេត្ត និងក្រុមការងារ ថ្នាក់ជាតិចុះជួយមូលដ្ឋាន ឯកឧត្តម ឆាន់ សាផាន ប្រធានក្រុមការងាររាជរដ្ឋាភិបាលចុះជួយស្រុកឆ្លួង បានជួយឧបត្ថម្ភជាប្រេងម៉ាស៊ូតចំនួន៥,០០០លីត្រ និងឯកឧត្តម វ៉ា ថន អភិបាល នៃគណៈអភិបាលខេត្តក្រចេះបានជួយប្រេងម៉ាស៊ូតចំនួន១០០០លីត្រ ឯកឧត្តម វេង សាខុន រដ្ឋមន្ត្រីក្រសួងកសិកម្មបានជួយប្រេងម៉ាស៊ូតចំនួន១,០០០លីត្រ និងមន្ទីរធនធានទឹក និងឧតុនិយមខេត្តក្រចេះបានជួយអន្តរាគមន៍ម៉ាស៊ីនបូមទឹកខ្នាតធំចំនួន២គ្រឿង និងប្រេងម៉ាស៊ូតចំនួន២,០០០លីត្រព្រមទាំងសមាជិកនៃក្រុមការងារឧបត្ថមម៉ាស៊ូតបន្ថែមចំនួន៤០កាន និងថវិកាចំនួន៣លាន ២សែនរៀលផងដែរ ក្នុងការបូបទឹកស្តុកទុកជួយសង្គ្រោះស្រូវរបស់ប្រជាពលរដ្ឋក្នុងរដូវប្រាំងនាពេលខាងមុខ នៅភូមិសាស្ត្រឃុំខ្សាច់អណ្តែត ស្រុកឆ្លូងខេត្តក្រចេះ៕
