បាត់ដំបងៈនាយខណ្ឌរដ្ឋបាលជលផលខេត្តបាត់ដំបង បានឱ្យដឹង នៅថ្ងៃទី២៦ខែតុលា ឆ្នាំ២០២០នេះថាៈកម្លាំងសមត្ថកិច្ចចម្រុះក្នុងខែតុលា ឆ្នាំ២០២០ បានចុះបង្ក្រាបបទល្មើសនេសាទ បានចំនួន ១៥ ករណី។ ព្រមទាំងដកហូតបាន វត្ថុតាងបទល្មើស មួយចំនួន ដូចជា: សាច់មង ១២.០០០ ម៉ែត្រ ស្បៃមុង ចំនួន ៦០០ម៉ែត្រ បង្គោលចំនួន ៨.៣៩០ ដើម ឡុក៨៧គ្រឿង លូស្បៃមុង១៨មាត់ និងលែងត្រីចម្រុះ ចំនួន ៣៨៥ គីឡូក្រាមចូល ទៅបឹងធម្មជាតិវិញ។
លោក ជួង សុភា នាយខណ្ឌរដ្ឋបាលជលផល ខេត្តបាត់ដំបង បានបន្តថាៈ នៅក្នុងរដូវបិទនេសាទនេះ ដោយសារស្ថានភាពស្មុគ្រស្មាញ និងទឹកឡើងខ្លាំង ពិបាកដឹកជញ្ជូនឧបករណ៍ល្មើសច្បាប់ យកមករក្សាខទុក នៅខណ្ឌរដ្ឋបាលជល សមត្ថកិច្ចចម្រុះ សម្រេចដុតកម្ទេចចោល។ ឧបករណ៍ទាំងនោះ នៅនឹងកន្លែង ដើម្បីជាការព្រមាន ដល់ជនខិលខូចផង ព្រមទាំពិន័យបានថវិកា ៥ លានរៀល បង់ចូលថវិការដ្ឋ ៥០ ភាគរយ ។
លោកនាយខណ្ឌបានបញ្ជាក់ថាៈក្នុងការចុះប្រតិបត្តិការម្តងៗសមត្ថកិច្ចចម្រុះមិនដែលចាប់បានជនខិលខូចម្នាក់ណាទេ ព្រោះពួកគេបានដាក់បណ្តាញ រាយការណ៍ ប្រាប់បក្ខពួកតាមរយ:ទូរស័ព្ទ ឬអាយកូមឱ្យបក្ខពួកដឹងជាមុន ហើយនាំគ្នារត់គេចខ្លួនអស់៕
