ខេត្តក្រចេះ៖កម្លាំងនគរបាលក្រុងក្រចេះ សហការជាមួយ កម្លាំងនគរបាលស្រុកចិត្របុរី និងកម្លាំងជំនាញព្រហ្មទណ្ឌកំរិតស្រាលខេត្តក្រោមបញ្ជាពីលោកលន់សុផាតស្នងការនគរបាលខេត្ត។សមត្ថកិច្ចបានឃាត់ខ្លួនជនសង្ស័យម្នាក់នៅត្រង់រមណីយដ្ឋានថ្មបាំងស្ថិតនៅភូមិបន្ទាយឃុំគោលាប់ស្រុកចិត្របុរី ខេត្តក្រចេះកាលពីល្ងាចថ្ងៃទី៣០ ខែសីហា ឆ្នាំ២០២០។
មន្ត្រីនគរបាលក្រុងក្រចេះ បានឱ្យដឹងថាជនសង្ស័យឈ្មោះដៀងវ៉ាន់ភេទប្រុសអាយុ៣៨ឆ្នាំមានទីលំនៅ ភូមិថ្មី ឃុំពង្រ ស្រុកសាមគ្គីមានជ័យ ខេត្តកំពង់ឆ្នាំង ពាក់ព័ន្ធនិងអំពើលួច ប្រព្រិត្តនៅថ្ងៃទី៣០ ខែសីហា ស្ថិតនៅបន្ទុបជួល ស្ថិតក្នុងភូមិដូនជ្រាំ សង្កាត់ក្រចេះ ក្រុងក្រចេះខេត្តក្រចេះ ។
មន្ត្រីដដែលបានបន្តថាៈនៅថ្ងៃទី៣០ខែសីហាវេលាទៀបភ្លឺឈ្មោះហួតដាបានជិះម៉ូតូទៅរៀបចំឥវ៉ាន់ឱ្យប្រពន្ធលក់ដូរនៅផ្សារក្រចេះ។ពេលត្រឡប់មកដល់បន្ទប់វិញខ្លួនបានយកម៉ូតូទុកនៅមុខបន្ទប់និងទុកកូនសោរឱ្យប្រពន្ធសម្រាប់ជិះទៅលក់ឥវ៉ាន់នៅផ្សារហើយខ្លួនក៏ជិះម៉ូតូសណ្ដោងរឺម៉កមកកន្លែងធ្វើការ រហូតដល់ម៉ោង៧ព្រឹកប្រពន្ធខ្លួនចេញមកយកម៉ូតូទើបដឹងថាបាត់ម៉ូតូ។
បន្ទាប់ពីទទួលបានព័ត៌មានភ្លាមៗកម្លាំងនគរក្រុងក្រចេះ សហការជាមួយនគរបាលចិត្របុរី និងនគរបាលជំនាញខេត្តបានស៊ើបអង្កេតស្រាវជ្រាវជាបន្តបន្ទាប់និងឈានទៅឃាត់ខ្លួនជនសង្ស័យម្នាក់។ខណៈដែលជនសង្ស័យរូបនេះព្យាយាមរត់គេចពីសមត្ថកិច្ចមកសម្ងំលាក់ខ្លួនចំណែកបក្ខពួកម្នាក់ទៀតបានរត់គេចខ្លួនបាត់។
សមត្ថកិច្ចបានដកហូតម៉ូតូចំនួន២គ្រឿងមធ្យោបាយរបស់ជនសង្ស័យ១គ្រឿងនិងម៉ូតូជនរងគ្រោះ១គ្រឿងនិងឧបករណ៍កាច់សោរម៉ូតូ១សម្រាប់។បច្ចុប្បន្នជនសង្ស័យនិងវត្ថុតាងកំពុងឃាត់ខ្លួននិងរក្សាទុកបណ្ដោះអាសន្ននៅស្នងការដ្ឋាននគរបាលខេត្តដើម្បីចាត់ការតាមនីតិវិធីច្បាប់បន្ត៕
