ខេត្តព្រះសីហនុ ៖ លោក ម៉ាង ស៊ីណេត អភិបាលរងខេត្តព្រះសីហនុ ដឹកនាំកិច្ចប្រជុំប្រមូល និងគ្រប់គ្រងថវិកា ដែលទទួលបានពីភ្ញៀវទេសចរទៅកម្សាន្តតាមកោះសម្រាប់ទ្រទ្រង់ដល់ការគ្រប់គ្រង និងអភិរក្សធនធានតំបន់ឆ្នេរក្នុងខេត្តព្រះសីហនុ ដោយមានការចូលរួមពីលោកជំទាវសមាជិកក្រុមប្រឹក្សាខេត្ត នាយករងរដ្ឋបាលសាលាខេត្ត អនុប្រធានមន្ទីរ អង្គភាពពាក់ព័ន្ធ ប្រធានសមាគមន៍ទូកទេសចរណ៍ និងម្ចាស់ក្រុមហ៊ុនទូកដឹកភ្ញៀវទេសចរណ៍នៅរសៀលថ្ងៃសុក្រ ២កើត ខែមាឃ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៥ ខែមករា ឆ្នាំ២០២១។
តំណាងក្រុមហ៊ុនទូកដឹកភ្ញៀវទេសចរណ៍បានលើកឡើងពីផលពិបាកនៃការអាក់ខានបង់ថ្លៃសំបុត្រជូនរដ្ឋបាលខេត្តព្រះសីហនុ ដោយសារតែផលប៉ះពាល់ដោយសារជំងឺកូវីដ-១៩ គ្មានភ្ញៀវទេសចរទៅលេងកម្សាន្តតាមកោះក្នុងខេត្តព្រះសីហនុ។
លោកឧកញ៉ា ទៀ វិចិត្រ ប្រធានសមាគមន៍ទូកទេសចរណ៍ប្រចាំខេត្តព្រះសីហនុទទួលយកសំណើរបស់រដ្ឋបាលខេត្ត និងធ្វើការប្រជុំពិភាក្សាជាមួយម្ចាស់ក្រុមហ៊ុនទូកដឹកភ្ញៀវទេសចរ ដើម្បីពន្លឿនការប្រមូលថវិកាសម្រាប់ទ្រទ្រង់ដល់ការគ្រប់គ្រង និងអភិធនធានតំបន់ឆ្នេរក្នុងខេត្តព្រះសីហនុ។
លោក ម៉ាង ស៊ីណេត អភិបាលរងខេត្តព្រះសីហនុបានមានប្រសាសន៍ថា ក្រុមហ៊ុនត្រូវមានឆន្ទៈការទទួលខុសត្រូវសហការចូលរួមជាមួយរដ្ឋបាលខេត្ត ក្នុងការប្រមូលថវិកាចំនួន២ដុល្លារពីលើតម្លៃសំបុត្ររបស់ភ្ញៀវទេសចរក្នុងម្នាក់ៗ ហើយការប្រមូលថវិកានេះ គឺបានការឯកភាពពីក្រសួងសេដ្ឋកិច្ច និងហិរញ្ញវត្ថុ ស្តីពីស្ថានភាពគ្រប់គ្រង និងការធ្វើអាជីវកម្មទូកទេសចរណ៍នៅខេត្តព្រះសីហនុ។ ទន្ទឹមនោះ លោកក៏បានស្នើសុំឱ្យលោកប្រធានសមាគមន៍ រៀបចំបោះសំបុត្រទូកឯកភាពមួយ ដោយមានឡូហ្គោក្រុមហ៊ុន និងឡូហ្គោប្រធានសមាគមន៍ ដើម្បីយើងមានភាពងាយស្រួលក្នុងការគ្រប់គ្រងប្រមូលថវិកាជូនរដ្ឋបាលខេត្តព្រះសីហនុ។
លោកអភិបាលរងខេត្តបានបន្តថា រាជរដ្ឋាភិបាលកម្ពុជា និងរដ្ឋបាលខេត្តព្រះសីហនុបានរៀបចំកែលម្អឆ្នេរសមុទ្រជាលំហសាធារណៈដ៏វែង ក្នុងការទាក់ទាញប្រជាពលរដ្ឋនៅទូទាំងប្រទេសមកទស្សនាកម្សន្តនៅខេត្តព្រះសីហនុ និងបន្តទៅលេងកម្សាន្តតាមបណ្តាកោះនានាក្នុងខេត្តព្រះសីហនុ។
លោកអភិបាលរងខេត្តក៏បានធ្វើការណែនាំឱ្យម្ចាស់ក្រុមហ៊ុនទូកទេសចរណ៍ទាំងអស់ត្រូវមានអាវពោងសុវត្ថិភាព ក្នុងការដឹកជញ្ជូនភ្ញៀវប្រកបដោយផាសុខភាព ធានានូវសុវត្ថិភាពជូនភ្ញៀវទេសចរ។ ព្រមទាំងឱ្យក្រុមហ៊ុនដឹកជញ្ជូនភ្ញៀវទេសចរត្រូវទូទាត់ថវិកាថ្លៃសំបុត្រប្រចាំឆ្នាំ២០២០ ជូនរដ្ឋបាលខេត្តព្រះសីហនុ និងបានថ្លែងអំណរគុណក្រុមហ៊ុនទូកទេសចរណ៍របស់លោកឧកញ៉ា ទៀ វិចិត្រ ដែលបានចូលរួមជាមួយរដ្ឋបាលខេត្ត ប្រមូលថវិកា២ដុល្លារ បង់ជូនសាលាខេត្តបានទាន់ពេលវេលា សូមឱ្យក្រុមហ៊ុនផ្សេងទៀត ត្រូវពន្លឿនការបង់ថវិកាមករដ្ឋបាលខេត្ត យោងតាមលិខិតលេខ ៦៨៦៤សហវ- អទច ចុះថ្ងៃទី២៦ ខែកក្កដា ឆ្នាំ២០១៧ របស់ក្រសួងសេដ្ឋកិច្ច និងហិរញ្ញវត្ថុ ស្តីពីស្ថានភាពគ្រប់គ្រង និងការធ្វើអាជីវកម្មទូកទេសចរណ៍នៅខេត្តព្រះសីហនុ។
បើតាមរបាយការណ៍មន្ទីរទេសចរណ៍ខេត្តព្រះសីហនុបានឱ្យដឹងថា ខេត្តព្រះសីហនុ មានក្រុមហ៊ុនទូកដឹកភ្ញៀវទេសចរចំនួន១០ក្រុមហ៊ុន ក្នុងនោះចំនួន០៦បានស្នើរសុំអាជ្ញាបណ្ណពីក្រសួងទេសចរណ៍ និង ០៤ សុំអាជ្ញាបណ្ណនៅសាលាខេត្តព្រះសីហនុ៕
